Rhannu gofal
Dylai penderfyniadau ynghylch pwy ddylai gymryd cyfrifoldeb am ofal neu driniaeth barhaus ar ôl diagnosis neu asesiad cychwynnol fod yn seiliedig ar les pennaf y claf, yn hytrach nag ar hwylustod neu gost y feddyginiaeth a’r monitro neu’r gwaith dilyn i fyny cysylltiedig.
Gyda gofal a rennir, mae angen i bob parti gytuno, gan gynnwys y claf. Mae’n hanfodol bod pob parti’n cyfathrebu’n effeithiol ac yn gweithio gyda’i gilydd.
Presgripsiynu ar sail cynnig neu argymhelliad gan gydweithiwr
Os ydych yn presgripsiynu ar sail cynnig neu argymhelliad gweithiwr gofal iechyd proffesiynol arall, rhaid i chi fod yn fodlon bod y presgripsiwn yn angenrheidiol, yn briodol i'r claf, o fewn terfynau eich cymhwysedd a bod gennych ddigon o wybodaeth i symud ymlaen yn ddiogel.
Os ydych chi’n dirprwyo’r gwaith o asesu addasrwydd claf ar gyfer meddyginiaeth, rhaid i chi fod yn fodlon bod gan y sawl rydych chi’n dirprwyo iddo y cymwysterau, y profiad, y wybodaeth a’r sgiliau i wneud yr asesiad. Rhaid i chi roi digon o wybodaeth iddynt am y claf i gynnal yr asesiad. Rhaid i chi hefyd wneud yn siŵr eu bod yn dilyn ein canllawiau ar Penderfynu a chydsynio ym mharagraffau 42 i 47.
Yn y naill achos a'r llall (paragraffau 75-76), byddwch chi’n gyfrifol am y camau a gymerwch i sicrhau bod y presgripsiwn yn briodol, yn angenrheidiol ac yn ddiogel.
Argymell a chynnig meddyginiaethau, triniaethau neu ddyfeisiau i gydweithiwr eu rhagnodi
Os ydych chi’n argymell neu’n cynnig bod cydweithiwr yn presgripsiynu meddyginiaeth, triniaeth neu ddyfais benodol ar gyfer claf, rhaid i chi ystyried a yw’n gallu gwneud hynny’n ddiogel. Rhaid i chi fod yn fodlon bod ganddo ddigon o wybodaeth, profiad a gwybodaeth am y claf a’r feddyginiaeth, y driniaeth neu’r ddyfais er mwyn presgripsiynu. Dylech fod yn barod i ateb ei gwestiynau a’i gynorthwyo fel arall i ofalu am y claf, yn ôl yr angen.
Presgripsiynu wrth rannu gofal
Os ydych yn rhannu cyfrifoldeb am ofal claf gyda chydweithiwr, rhaid i chi fod yn gymwys i arfer eich cyfran chi o gyfrifoldeb clinigol. Dylech chi wneud y canlynol:
- sicrhau bod y wybodaeth ddiweddaraf gennych am y meddyginiaethau sy’n cael eu rhoi ar bresgripsiwn i’r claf
- gallu adnabod sgil-effeithiau niweidiol difrifol sy'n digwydd yn aml
- sicrhau bod trefniadau monitro clinigol priodol ar waith a bod y claf a'r gweithwyr gofal iechyd proffesiynol perthnasol yn eu deall
- cadw’n gyfredol â chanllawiau perthnasol ar ddefnyddio’r meddyginiaethau ac ar reoli cyflwr y claf.
Wrth gynnig trefniant rhannu gofal, gall arbenigwyr ddweud wrth feddyg teulu'r claf pa feddyginiaeth i'w rhoi ar bresgripsiwn. Os ydych chi’n argymell meddyginiaeth newydd neu feddyginiaeth nad yw’n cael ei rhoi yn aml ar bresgripsiwn, dylech nodi’r dos a’r dull o’i rhoi, a chytuno ar brotocol ar gyfer triniaeth. Dylech egluro’r defnydd o feddyginiaethau didrwydded a gwyriadau oddi wrth ganllawiau awdurdodol neu driniaethau a argymhellir. Dylech hefyd roi digon o wybodaeth i’r meddyg teulu a’r claf fel bod modd rheoli cyflwr y claf yn ddiogel.22
I gael rhagor o wybodaeth gweler canllawiau’r Cyngor Fferyllol Cyffredinol ar ddarparu gwasanaethau fferylliaeth o bell, gan gynnwys ar y rhyngrwyd (Ebrill 2019, a ddiweddarwyd ym mis Mawrth 2022). Mae Cymdeithas Fferyllol Gogledd Iwerddon (PSNI) yn darparu canllawiau ar gyfer fferyllfeydd yng Ngogledd Iwerddon.
Os ydych chi’n ansicr ynghylch eich cymhwysedd i gymryd cyfrifoldeb dros ofal parhaus y claf, dylech ofyn am ragor o wybodaeth neu gyngor gan y clinigydd sy’n rhannu’r cyfrifoldebau gofal neu gan gydweithiwr profiadol arall. Os ydych yn dal i fod yn anfodlon, dylech egluro hyn i'r clinigydd arall, ac i'r claf, a gwneud trefniadau priodol ar gyfer ei ofal parhaus.
