Adroddiad blynyddol 2024

Mae gweithlu meddygol y Deyrnas Unedig yn parhau i newid, gan ddod yn fwyfwy amrywiol o ran ethnigrwydd a rhywedd.

Erbyn hyn, mae mwy o feddygon o leiafrifoedd ethnig ar y gofrestr na meddygon gwyn, sy’n gysylltiedig â nifer fawr o raddedigion rhyngwladol yn ymuno â’r gweithlu ers 2016. Mae graddedigion y Deyrnas Unedig hefyd yn fwyfwy amrywiol. Roedd 60% o’r rhai a gafodd le mewn ysgolion meddygol yn 2023/24 ledled y Deyrnas Unedig yn fenywod. Ac yn 2024, gwelsom fenywod yn dod yn agos at fod yn fwy niferus na dynion ar y gofrestr am y tro cyntaf, gyda’r trobwynt wedyn yn cael ei gyrraedd yn gynnar yn 2025. Mae’r amrywiaeth hon yn golygu ei bod yn bwysicach nag erioed bod arweinwyr gofal iechyd yn meithrin y diwylliannau cefnogol a chynhwysol sy’n galluogi meddygon i ddarparu’r gofal gorau posibl.

Mae’r galw ar ein gwasanaethau iechyd wedi parhau’n uchel, gan effeithio ar lesiant y proffesiwn. Mae meddygon yn adrodd am bryderon ar draws amrywiaeth o fetrigau, gan gynnwys lludded, anfodlonrwydd, a'r gallu i ddarparu lefel ddigonol o ofal i gleifion. Yn ogystal â bod yn niweidiol iawn i feddygon, mae'r materion hyn yn tanseilio cynhyrchiant a rhediad llyfn ein gwasanaethau iechyd, gan greu risgiau dilynol i ddarparu gofal diogel i gleifion.

Yn y cyd-destun newidiol a heriol hwn, rydym wedi chwarae ein rhan i gefnogi systemau iechyd y Deyrnas Unedig i ddarparu gofal o safon uchel ar gyfer y cleifion maent yn eu gwasanaethu.

Ym mis Ionawr 2024, daeth fersiwn ddiweddaraf Arfer Meddygol Da i rym. Mae’r safonau’n adlewyrchu ffocws cryfach ar ymddygiad a gwerthoedd, gan gydnabod rôl ganolog diwylliant ac arweinyddiaeth o ran pennu canlyniadau da i gleifion. Yn 2024, bu ein timau allgymorth yn siarad â meddygon ledled y Deyrnas Unedig am roi’r canllawiau ar waith yn ymarferol. Yn ogystal â chodi ymwybyddiaeth o’r safonau diweddaraf, roedd y sesiynau hyn wedi helpu i ddatblygu cysylltiadau a meithrin ymddiriedaeth a hyder yn y proffesiwn.

Cynhwysiant sydd wrth galon diwylliant da, ac ym mis Hydref, fe wnaethom gyhoeddi diweddariad ar y targedau cydraddoldeb, amrywiaeth a chynhwysiant y gwnaethom eu gosod i ni ein hunain yn 2021. Gwelsom sut mae ein hydrechion yn dwyn ffrwyth, gyda gostyngiad yn anghymesuredd atgyfeiriadau addasrwydd cyflogwyr i ymarfer, lleihau’r bwlch cyrhaeddiad mewn hyfforddiant arbenigol ar gyfer meddygon sydd â chymwysterau rhyngwladol, a gwell cynrychiolaeth o gydweithwyr o leiafrifoedd ethnig yng ngweithlu’r GMC ei hun. Ond fe wnaeth ein dadansoddiad hefyd dynnu sylw at faint yr her, a’r gwaith sy’n weddill i gyflawni newid systemig a diwylliannol parhaus. Rydym wedi ymrwymo o hyd i chwarae ein rhan o ran cyflawni’r newid hwnnw, drwy ddefnyddio ein data a’r cymorth rheng flaen rydym yn ei ddarparu drwy ein timau allgymorth.

Ar ddiwedd y flwyddyn, fe gyrhaeddon ni garreg filltir bwysig wrth i gymdeithion meddygol (PA) a chymdeithion anaesthesia (AA) gael eu rheoleiddio am y tro cyntaf. Bydd y cam pwysig hwn yn helpu i sicrhau cleifion a'r cyhoedd bod y gweithwyr proffesiynol hyn wedi eu hyfforddi'n briodol, yn bodloni'r safonau rydym yn eu gosod ac y gellir cymryd camau pan godir pryderon. Mae hefyd yn benllanw blynyddoedd o ymgysylltu â rhanddeiliaid ledled y Deyrnas Unedig. Rydym yn parhau i weithio’n agos gyda Llywodraeth y Deyrnas Unedig ar ei newidiadau arfaethedig i’r ddeddfwriaeth sy’n rheoli’r ffordd rydym yn gweithredu, ac edrychwn ymlaen at weld y diwygiadau hyn yn cael eu rhoi ar waith, er budd y cyhoedd a’r proffesiwn fel ei gilydd.

Yn 2024 hefyd, cyflwynwyd yr Asesiad Trwyddedu Meddygol (MLA), sy’n profi gwybodaeth, sgiliau ac ymddygiad meddygon sydd eisiau ymarfer yn y Deyrnas Unedig. Mae'r Asesiad yn gosod trothwy cyffredin ar gyfer ymarfer diogel ar draws yr holl raddedigion meddygol, sy'n golygu y bydd myfyrwyr o'r Deyrnas Unedig ac ymgeiswyr rhyngwladol yn cymryd asesiadau sy'n seiliedig ar yr un pynciau am y tro cyntaf. Yn ogystal â chryfhau diogelwch cleifion a gwella cysondeb, bydd yr Asesiad yn galluogi darparwyr cyrsiau i fod yn arloesol o ran eu cynnig i fyfyrwyr, gan gynnal safonau uchel ar yr un pryd.

Mae disgwyliadau meddygon a’r rhai y maent yn gofalu amdanynt yn esblygu, a rhaid i ni, a’r system iechyd ehangach, fod yn effro i’r newidiadau hynny. Nid gyrfa linellol, mewn arbenigedd penodol, heb egwyliau, yw'r dewis diofyn i lawer bellach, gyda meddygon sy'n cael eu cyflogi'n lleol bellach y grŵp meddygon sy'n tyfu gyflymaf. Nid ydynt hwy, na llawer o rai eraill, yn cael eu gwasanaethu’n dda gan anhyblygrwydd y system bresennol.

Rydym yn parhau i chwarae rhan hanfodol wrth oruchwylio addysg israddedig a hyfforddiant ôlraddedig i feddygon, gan gymryd camau lle bo angen i sicrhau bod amgylcheddau hyfforddi yn addas i'r diben ac yn diwallu anghenion cleifion, heddiw ac yn y dyfodol. Drwy ein rhaglen Dyfodol addysg a datblygu gyrfa (FutureEd) rydym yn edrych yn feirniadol ar y ffordd mae meddygon yn dysgu, yn hyfforddi ac yn ymarfer, ac yn ystyried beth sydd angen ei newid er mwyn i bob meddyg allu cyflawni ei botensial a mwynhau gyrfa werth chweil. Y gwaith hwn oedd ffocws ein symposiwm blynyddol ym mis Tachwedd, ac mae'n sgwrs a fydd yn parhau wrth i ni baratoi at ein strategaeth 2026-30.

Rydym yn ffodus o elwa ar fewnbwn a dealltwriaeth o’r tu allan i’r GMC, sy’n rhoi darlun eang i ni o’r proffesiwn a’r dirwedd ehangach rydym yn gweithio ynddi. O’r cymrodorion clinigol sy’n gweithio yn y GMC ac sy’n rhannu eu persbectif rheng flaen, i’r aelodau o’r cyhoedd y mae eu profiad bywyd mor bwerus; mae eu cyfraniadau’n hynod werthfawr ac yn siapio ein gwaith er gwell.

Wrth i anghenion cleifion newid, ac wrth i’r gweithlu sy’n eu hwynebu barhau i newid, mae cydweithio ar draws pob rhan o’r system yn bwysicach nag erioed. Edrychwn ymlaen at weithio gyda rhanddeiliaid ym mhob rhan o’r Deyrnas Unedig, wrth i ni geisio gwasanaethu’r cleifion a’r cyhoedd sydd wrth galon ein gwaith.

Cymerwch gipolwg ar ein blwyddyn mewn rhifau. Dewch o hyd i ystadegau allweddol am ein gwaith, gan gynnwys: 

• Y gofrestr feddygol
• Gosod a chynnal safonau
• Goruchwylio addysg a hyfforddiant meddygol
• Cefnogi’r bobl rydym yn eu gwasanaethu
• Ymchwilio i bryderon a gweithredu arnynt

Mae ein strategaeth gorfforaethol yn nodi’r pedair thema sy’n siapio ein holl waith, gan ein helpu i gyflawni ein gweledigaeth deng mlynedd.

Cymerwch gipolwg ar grynodeb o’r gweithgareddau allweddol rydym wedi eu cynnal yn ystod 2024 i gefnogi ein hamcanion strategol, gan gynnwys:

• Dod â chymdeithion meddygol a chymdeithion anaesthesia dan drefn reoleiddiol, a diwygio rheoleiddio
• Yr Asesiad Trwyddedu Meddygol
• Dyfodol addysg a datblygiad gyrfa
• Cyflawni ein swyddogaethau craidd
• Cefnogi safonau proffesiynol
• Defnyddio data, ymchwil a mewnwelediad
• Cydraddoldeb, amrywiaeth a chynhwysiant
• Buddsoddi yn ein pobl

Mae ein timau allgymorth yn ymgysylltu’n uniongyrchol â meddygon, cymdeithion meddygol, cymdeithion anaesthesia, myfyrwyr, cyflogwyr, addysgwyr a rhanddeiliaid eraill i gynorthwyo’r gwaith o ddarparu gofal da a diogel i gleifion.

Mae’r cysylltiadau lleol cryf maent yn eu meithrin yn ein galluogi i hyrwyddo arferion da a dylanwadu ar newid cadarnhaol ac adeiladol ar gyfer meddygon, cymdeithion meddygol, cymdeithion anaesthesia, cleifion a rhanddeiliaid eraill yn systemau gofal iechyd y Deyrnas Unedig.

Yn yr adran hon o’r adroddiad, rydym yn tynnu sylw at rywfaint o’r gwaith mae’r timau wedi ei wneud ar y cyd â phartneriaid yn 2024.

Gallwch hefyd gael rhagor o wybodaeth am ein Gwaith yng Nghymru, Gogledd Iwerddon a’r Alban drwy ddarllen ein hadroddiadau cenedlaethol diweddaraf, sydd ar gael ar ein gwefan.

Rydym yn sefydliad sy’n gyfrifol yn gymdeithasol (Saesneg yn unig), ac rydym bob amser yn chwilio am ffyrdd Newydd o wreiddio cynaliadwyedd, effaith gymdeithasol a moeseg yn yr hyn rydym yn ei wneud.

Darganfyddwch sut y gwnaethom fwrw ymlaen ag ymdrechion i leihau ein hôl troed carbon a chefnogi symudedd cymdeithasol ac ehangu cyfranogiad mewn hyfforddiant meddygol yn y Deyrnas Unedig.

Darllenwch ein hadolygiad ariannol 2024 a’n cyfrifon, ac adroddiad y Pwyllgor Archwilio a Risg.