Adroddiad blynyddol 2025

Rhagair

Mae gwasanaethau iechyd ledled y Deyrnas Unedig yn parhau i weithredu mewn amgylchedd cymhleth a heriol, wedi’i siapio gan y galw cynyddol a phwysau’r gweithlu. Fel rheoleiddiwr proffesiynol, rydym yn gosod safonau ar gyfer gofal diogel i gleifion, yn goruchwylio addysg a hyfforddiant, yn cynnal ein cofrestrau ac yn ymateb i bryderon am addasrwydd i ymarfer. Cadarnhaodd yr Awdurdod Safonau Proffesiynol ein bod wedi bodloni pob un o’i 18 Safonau Rheoleiddio Da yn 2024– 2025. Ochr yn ochr â’n swyddogaethau rheoleiddio craidd, rydym yn gweithio gydag eraill ar y materion sy’n effeithio ar sut mae gofal yn cael ei ddarparu’n ymarferol. Wrth wneud hynny, rydym yn rhoi sicrwydd ac yn cyfrannu ein dadansoddiad a’n safbwynt ar yr heriau sy’n wynebu systemau gofal iechyd y Deyrnas Unedig.

2025 oedd blwyddyn olaf ein strategaeth 2021-25. Dros y cyfnod hwnnw o bum mlynedd, mae cyfansoddiad y gweithlu meddygol wedi amrywio, gan ddod â chyfleoedd a heriau. 2025 hefyd oedd y flwyddyn lawn gyntaf i ni reoleiddio cymdeithion meddygol a chymdeithion anaesthesia. Mewn cyd-destun sy’n esblygu drwy’r amser, rhaid i ni barhau i gyflawni ein cyfrifoldebau rheoleiddio craidd yn effeithiol, gan gydnabod bod cydweithio agos a rhannu gwybodaeth yn bwysicach nag erioed.

Rydym yn gweithio gydag eraill ar draws y pedair gwlad i lywio’r gwaith o gynllunio ar gyfer dyfodol gwasanaethau, gan ddefnyddio ein data ac ar ein hadroddiadau nodedig, sy’n rhoi darlun manwl o gyfansoddiad a llesiant y gweithlu meddygol, yn ogystal â’r ffactorau sy’n effeithio ar recriwtio a chadw staff.

Yn 2025, dangosodd y data pwysigrwydd cefnogi meddygon sydd wedi cymhwyso’n rhyngwladol i adeiladu gyrfaoedd cynaliadwy yng ngwasanaethau iechyd y Deyrnas Unedig, a daethom â’r dystiolaeth hon i sgyrsiau â rhanddeiliaid i dynnu sylw at ei goblygiadau ar gyfer cynllunio’r gweithlu. 

Wrth i broffil y gweithlu newid, mae’n hanfodol ein bod yn parhau i flaenoriaethu cydraddoldeb, amrywiaeth a chynhwysiant. Rydym wedi parhau i ganolbwyntio ar gamau ymarferol i gefnogi meddygon sy’n newydd i ymarfer yn y Deyrnas Unedig. 

Mae gweithlu amrywiol yn dod ag ystod ehangach o safbwyntiau a phrofiadau, sy’n cryfhau’r broses o wneud penderfyniadau proffesiynol ac yn helpu systemau iechyd i ymateb i anghenion cleifion. Mae hefyd yn ei gwneud yn ofynnol i sefydliadau sicrhau bod amgylcheddau gwaith a hyfforddiant yn gynhwysol, yn gefnogol ac yn deg. Rydym yn cymryd camau ledled y Deyrnas Unedig i fynd i’r afael â gwahaniaethau mewn profiadau meddygon ar draws ymarfer a hyfforddiant proffesiynol, gan gydnabod bod diwylliannau gwaith cefnogol yn hanfodol ar gyfer cadw gweithwyr proffesiynol medrus ac ar gyfer darparu gofal diogel i gleifion.

Wrth i’r gweithlu a gwasanaethau gofal iechyd barhau i esblygu, mae’n bwysig bod y fframwaith ar gyfer rheoleiddio proffesiynol yn addasu i’r newidiadau hyn. Wrth edrych ymlaen at ein strategaeth 2026-30, un flaenoriaeth allweddol yw moderneiddio’r ddeddfwriaeth sy’n sail i’n gwaith. 

Mae llawer o’r fframwaith deddfwriaethol presennol yn dyddio’n ôl dros bedwar degawd ac ni chafodd ei greu gyda systemau gofal iechyd heddiw mewn golwg. 

Ochr yn ochr ag ymdrechion i foderneiddio’r fframwaith deddfwriaethol, rydym hefyd yn gweithio i bennu’r cyfeiriad ar gyfer addysg a hyfforddiant meddygol yn y dyfodol. 

Wrth i anghenion y boblogaeth newid ac wrth i’r gweithlu drawsnewid, ein cyfrifoldeb ni yw sicrhau bod ein safonau’n cadw i fyny. Rhaid strwythuro addysg a datblygiad proffesiynol i roi’r sgiliau a’r wybodaeth i feddygon, cymdeithion meddygol a chymdeithion anaesthesia i fodloni anghenion cynyddol gymhleth cleifion, wrth addasu i ymarfer modern a llwybrau gyrfa. 

Bydd ein rhaglen waith yn y maes hwn yn gosod y sylfeini ar gyfer gyrfaoedd cynaliadwy mewn gwasanaethau iechyd yn y DU sydd angen sefydlogrwydd a chadw talent. Hwn fydd yr adolygiad llawn cyntaf o’r safonau addysg mewn degawd; ymrwymiad sylweddol a fydd yn cymryd amser. Ein nod yw sicrhau bod y model diwygiedig yn adlewyrchu anghenion cleifion, gweithwyr proffesiynol a’r gwasanaethau iechyd nawr ac yn y blynyddoedd i ddod. 

Mewn system dan bwysau sy’n newid yn gyflym, ein rôl yw cynnig eglurder, cysondeb a sicrwydd i’r cyhoedd. Rydym yn gwneud hynny drwy’r safonau rydym yn eu gosod, y ffordd rydym yn ymateb pan fydd pryderon yn cael eu codi, a thrwy weithio gyda phartneriaid i gefnogi meddygon, cymdeithion meddygol a chymdeithion anaesthesia i ddarparu gofal da a diogel i gleifion ledled y Deyrnas Unedig.

2025 mewn niferoedd

Cymerwch gipolwg ar ein blwyddyn mewn rhifau. Dewch o hyd i ystadegau allweddol am ein gwaith, gan gynnwys:

• Ein cofrestrau
• Gosod a chynnal safonau
• Goruchwylio addysg a hyfforddiant meddygol
• Cefnogi’r bobl rydym yn eu gwasanaethu
• Ymchwilio i bryderon a gweithredu arnynt

Cyflawni ein strategaeth

Mae ein strategaeth gorfforaethol yn nodi’r pedair thema sy’n siapio ein holl waith, gan ein helpu i gyflawni ein gweledigaeth deng mlynedd.

Mae rhagor o wybodaeth am y prif weithgareddau rydym wedi ymgymryd â nhw yn ystod 2025 i gefnogi ein nodau strategol, gan gynnwys:

• Rheoleiddio cymdeithion meddygol (PAs) a chymdeithion anesthesia (AAs), a diwygio rheoleiddio
• Dyfodol addysg a datblygiad gyrfa (FutureEd)
• Cyflawni ein swyddogaethau craidd
• Defnyddio data, ymchwil a mewnwelediad
• Gwarchod yr amgylchedd
• Buddsoddi yn ein pobl
• Cydraddoldeb, amrywiaeth a chynhwysiant
• Hyrwyddo cyfrifoldeb cymdeithasol

Ein gwaith ledled y Deyrnas Unedig

Mae ein timau allgymorth yn ymgysylltu’n uniongyrchol â meddygon, cymdeithion meddygol, cymdeithion anaesthesia, myfyrwyr, cyflogwyr, addysgwyr a rhanddeiliaid eraill i gynorthwyo’r gwaith o ddarparu gofal da a diogel i gleifion.

Mae’r cysylltiadau lleol cryf maent yn eu meithrin yn ein galluogi i hyrwyddo arferion da a dylanwadu ar newid cadarnhaol ac adeiladol ar gyfer meddygon, cymdeithion meddygol, cymdeithion anaesthesia, cleifion a rhanddeiliaid eraill yn systemau gofal iechyd y Deyrnas Unedig.

Yn yr adran hon o’r adroddiad, rydym yn tynnu sylw at rywfaint o’r gwaith mae’r timau wedi ei wneud ar y cyd â phartneriaid yn 2025.

Gallwch hefyd gael rhagor o wybodaeth am ein Gwaith yng Nghymru, Gogledd Iwerddon a’r Alban drwy ddarllen ein hadroddiadau cenedlaethol diweddaraf, sydd ar gael ar ein gwefan.

Adolygiad ariannol a chyfrifon

Darllenwch ein hadolygiad ariannol 2025 a’n cyfrifon, ac adroddiad y Pwyllgor Archwilio a Risg.