Adolygu meddyginiaethau

P’un a ydych yn cynnig, yn presgripsiynu neu’n darparu meddyginiaethau ar bresgripsiwn rheolaidd neu bresgripsiwn unigol, rhaid ichi sicrhau bod trefniadau addas ar waith ar gyfer monitro, dilyn i fyny ac adolygu. Dylech ystyried anghenion y claf ac unrhyw risg sy’n deillio o’r meddyginiaethau.

Pan fyddwch yn adolygu meddyginiaethau claf, dylech ailasesu ei angen am unrhyw feddyginiaethau didrwydded (gweler paragraff 102 i 105) y gallai fod yn eu cymryd, er enghraifft cyffuriau gwrthseicotig a ddefnyddir i drin symptomau ymddygiadol a seicolegol mewn dementia.

Bydd adolygu meddyginiaethau yn arbennig o bwysig:

1. lle gall cleifion fod mewn perygl, er enghraifft, y rheini sy’n fregus neu sydd â sawl salwch
2. lle mae i feddyginiaethau sgil effeithiau a allai fod yn ddifrifol neu’n gyffredin
3. lle mae’r claf yn cael meddyginiaeth reoledig neu feddyginiaeth arall sy’n cael ei chamddefnyddio’n aml
4. lle mae’r BNF neu ganllawiau clinigol awdurdodol eraill yn argymell profion gwaed neu fonitro arall yn rheolaidd.

Gall fferyllwyr helpu i wella diogelwch, effeithiolrwydd ac ymlyniad wrth ddefnyddio meddyginiaethau, er enghraifft drwy gynghori cleifion am eu meddyginiaethau a chynnal adolygiadau o feddyginiaethau. Nid yw hyn yn disodli eich dyletswydd chi i sicrhau eich bod yn rhagnodi ac yn rheoli meddyginiaethau’n briodol.

Dylech ystyried a gweithredu’n briodol ar wybodaeth a chyngor gan fferyllwyr a gweithwyr gofal iechyd proffesiynol eraill sydd wedi adolygu defnydd claf o feddyginiaethau. Mae hyn yn arbennig o wir os oes newidiadau i feddyginiaethau claf, neu os yw’n rhoi gwybod am broblemau gyda goddefiad, sgil effeithiau neu gyda chymryd meddyginiaethau yn ôl y cyfarwyddyd.