Presgripsiynu rheolaidd a phresgripsiynu dro ar ôl tro

Rhaid i chi sicrhau bod unrhyw bresgripsiwn rheolaidd y byddwch yn ei gynnig neu ei lofnodi yn ddiogel ac yn briodol (gweler paragraffau 75-78 uchod). Dylech ystyried manteision presgripsiynu dro ar ôl tro a, phan fo modd, leihau gweithgarwch presgripsiynu rheolaidd.

Yn yr un modd ag unrhyw bresgripsiwn, dylech gytuno gyda’r claf pa feddyginiaethau sy’n briodol a sut bydd ei gyflwr yn cael ei reoli, gan gynnwys dyddiad ar gyfer adolygu. Dylech egluro pam mae adolygiadau rheolaidd yn bwysig ac egluro i’r claf beth y dylai ei wneud os bydd:

1. yn dioddef sgil effeithiau neu adweithiau niweidiol
2. yn rhoi’r gorau i gymryd y meddyginiaethau cyn y dyddiad adolygu y cytunwyd arno, neu cyn i nifer penodol o bresgripsiynau rheolaidd gael eu rhoi.

Rhaid i chi lunio cofnodion clir o’r trafodaethau hyn a’ch rhesymau dros bresgripsiynu rheolaidd neu dros gynnig presgripsiynu rheolaidd.³³ 

Rhaid i chi fod yn fodlon bod y gweithdrefnau ar gyfer presgripsiynu dro ar ôl tro ac ar gyfer cynhyrchu presgripsiynau rheolaidd yn ddiogel a:

1. bod y claf cywir yn cael y presgripsiwn cywir
2. bod y dos cywir yn cael ei bresgripsiynu, yn enwedig i gleifion y mae eu dos yn amrywio yn ystod y driniaeth
3. bod cyflwr y claf yn cael ei fonitro, gan ystyried y defnydd o feddyginiaethau a’u heffeithiau
4. dim ond staff sy'n gymwys i wneud hynny sy'n paratoi presgripsiynau rheolaidd i'w hawdurdodi
5. bod cleifion sydd angen archwiliad neu asesiad pellach yn cael eu hadolygu gan weithiwr gofal iechyd proffesiynol priodol
6. bod unrhyw newidiadau i feddyginiaethau’r claf yn cael eu hadolygu’n feirniadol a’u hymgorffori’n gyflym yn ei gofnod.

Ym mhob adolygiad, dylech gadarnhau bod y claf yn cymryd ei feddyginiaethau yn ôl y cyfarwyddyd a gwneud yn siŵr bod angen y meddyginiaethau o hyd, eu bod yn effeithiol ac yn cael eu goddef. Gall hyn fod yn arbennig o bwysig yn dilyn arhosiad yn yr ysbyty neu newidiadau i feddyginiaethau yn dilyn ymweliad ag ysbyty neu ymweliad gartref. Dylech hefyd ystyried a yw ceisiadau am bresgripsiynau rheolaidd sy’n dod i law yn gynharach neu’n hwyrach na’r disgwyl o bosibl yn dangos ymlyniad gwael, gan arwain at therapi annigonol neu effeithiau niweidiol.

Pan fyddwch yn rhoi presgripsiynau rheolaidd neu’n presgripsiynu dro ar ôl tro, dylech sicrhau bod gweithdrefnau ar waith i fonitro a yw’r feddyginiaeth yn dal yn ddiogel ac yn angenrheidiol i’r claf. Dylech gadw cofnod o’r fferyllwyr sy’n dal presgripsiynau rheolaidd gwreiddiol er mwyn i chi allu cysylltu â nhw os oes angen.