Proffesiynoldeb - meysydd pryder allweddol

Mae angen i fyfyrwyr sy’n astudio i fod yn gymdeithion meddygol a chymdeithion anesthesia ymddwyn yn broffesiynol y tu allan i’r gwaith a’u cwrs. Mae hyn yn golygu y dylech chi osgoi gwneud pethau a fydd yn tanseilio’r hyder sydd gan gleifion mewn cymdeithion meddygol a chymdeithion anesthesia a’r hyder sydd gan y cyhoedd yn eich proffesiwn.

Er enghraifft, ni ddylech chi wneud sylwadau gwahaniaethol am unigolion neu grwpiau o bobl yn gyhoeddus neu ar y cyfryngau cymdeithasol. Bydd darparwr eich cwrs yn gweithredu os byddwch chi’n gwneud rhywbeth amhroffesiynol, fel cael rhybuddiad am ymddygiad meddw, hyd yn oed os digwyddodd y tu allan i'r cwrs neu dros wyliau'r haf. Mae hyn yn golygu y dylech chi gymryd cyfrifoldeb am eich gweithredoedd a bod yn ymwybodol y gallen nhw gael effaith ehangach ar sut mae darparwr eich cwrs yn ystyried eich proffesiynoldeb.

111. Rhaid i ymddygiad myfyriwr sy’n astudio i fod yn gydymaith meddygol neu’n gydymaith anesthesia gyfiawnhau'r hyder sydd gan gleifion a'r cyhoedd ynddyn nhw. Mae enghreifftiau o ymddygiad amhroffesiynol a fyddai’n achosi pryder wedi’u rhestru isod. Mae rhai o'r enghreifftiau hyn yn berthnasol i amgylchedd y cwrs, ond mae'n bwysig cofio bod angen i chi ymddwyn yn broffesiynol y tu allan i'ch cwrs hefyd. Gallai ymddygiad amhroffesiynol dros nifer o wahanol feysydd, neu ymddygiad amhroffesiynol ailadroddus neu barhaus, arwain at achosion addasrwydd i ymarfer. Mae’n bwysig nodi nad yw’r rhestr hon yn gynhwysfawr.