Beth y dylech ei ddisgwyl yn ystod archwiliad corfforol
- Enghreifftiau o gamymddwyn rhywiol tuag at gleifion
- Beth y dylech ei ddisgwyl yn ystod archwiliad corfforol
- Sut mae mynegi pryder am gamymddwyn rhywiol
- Gwybodaeth ddefnyddiol arall
Fel rhan o’ch gofal meddygol, mae’n bosibl y bydd angen i feddyg, cydymaith meddygol neu gydymaith anesthesia wneud archwiliad corfforol a allai olygu edrych ar wahanol rannau o’ch corff, eu teimlo a gwrando arnyn nhw.
Gall hyn wneud i chi deimlo’n annifyr, yn enwedig archwiliadau personol o’r bronnau, yr organau cenhedlu neu’r rectwm. Cyfrifoldeb y meddyg yw gwneud yn siŵr eich bod yn teimlo mor ddiogel â phosibl, a bod gennych reolaeth o'r sefyllfa.
Gall gwybod beth i'w ddisgwyl eich helpu i baratoi ar gyfer yr archwiliad a’ch helpu i ddeall a oes rhywbeth wedi mynd o'i le.
Archwiliadau personol
Cyn ac yn ystod archwiliad personol dylech ddisgwyl i’r meddyg wneud y canlynol:
- esbonio pam mae angen yr archwiliad, a rhoi cyfle i chi ofyn cwestiynau;
- esbonio’r hyn a fydd yn cael ei gynnwys yn yr archwiliad, fel bod gennych syniad clir o’r hyn i’w ddisgwyl, gan gynnwys unrhyw boen neu anesmwythdra;
- gwneud yn siŵr eich bod wedi rhoi eich caniatâd ar gyfer yr archwiliad
- rhoi gwybodaeth i chi mewn ffordd ddealladwy; os ydych yn cael trafferth deall Saesneg llafar, gallwch ofyn am gael defnyddio cyfieithydd neu wasanaeth cyfieithu;
- cynnig i chi gael hebryngwr diduedd yn bresennol lle bynnag y bo modd, fel arfer gweithiwr gofal iechyd proffesiynol arall a fydd yn aros am yr archwiliad cyfan ac yn gallu gweld beth mae'r unigolyn yn ei wneud
- rhoi preifatrwydd i chi ddadwisgo a gwisgo; dylid cynnal yr archwiliad mewn ystafell breifat neu dynnu'r llen
- gadael i chi ddadwisgo mewn ffordd sy’n gyfforddus i chi a chael eich gorchuddio gymaint â phosibl drwy gydol yr archwiliad
- gorffen yr archwiliad ar unrhyw adeg os ydych yn teimlo’n anghyfforddus.
Gallwch ddisgwyl iddynt wneud y canlynol:
- esbonio’n glir beth mae’n mynd i’w wneud ymlaen llaw
- gwisgo menig
- eich annog i ddweud os ydych yn teimlo’n anghyfforddus
- gofyn i chi ddadwisgo’r rhan o’ch corff sy’n cael ei harchwilio.
Ni ddylent:
- gwrthod esbonio beth mae’n ei wneud neu pam mae’n gwneud hynny
- gwrthod ateb eich cwestiynau
- eich archwilio heb fenig
- gwrthod cael hebryngwr yn bresennol
- gofyn i chi ddadwisgo rhannau o’ch corff nad ydynt yn cael eu harchwilio
- eich helpu i dynnu eich dillad oni bai eich bod wedi gofyn am help, neu ei fod wedi gofyn i chi a oes angen help arnoch
- gwneud sylwadau personol neu rywiol, neu ofyn cwestiynau sy’n gwneud i chi deimlo’n anghyfforddus.
