Gweithio gyda chydweithwyr

Mae’r rhan fwyaf o weithwyr meddygol proffesiynol yn gweithio mewn timau amlddisgyblaethol. Mae gwaith y timau hyn yn canolbwyntio ar anghenion a diogelwch cleifion yn bennaf. Mae arweinydd ffurfiol y tîm yn gyfrifol am berfformiad y tîm, ond mae’r tîm cyfan yn rhannu’r cyfrifoldeb dros nodi problemau, eu datrys a chymryd y camau priodol.

Rhaid eich bod yn fodlon gweithio gyda phobl a thimau eraill er mwyn cynnal a gwella perfformiad, gan newid systemau yn ôl yr angen er lles cleifion.

Dylech barchu rolau arwain a rheoli aelodau eraill y tîm, gan gynnwys cydweithwyr anfeddygol.

Mae’n hanfodol bod gweithiwr meddygol proffesiynol yn gweithio mewn ffordd effeithiol gyda chydweithwyr o ddisgyblaethau iechyd a gofal cymdeithasol eraill, o fewn a rhwng timau a sefydliadau, er mwyn sicrhau gofal da a diogel ar gyfer cleifion. Beth bynnag fo cyfansoddiad y timau yr ydych yn gweithio ynddynt, rhaid i chi barchu a gwerthfawrogi sgiliau a chyfraniad pob unigolyn.

Rhaid i chi fynd i’r afael gyda gwahaniaethu pan fydd yn codi, gan annog eich cydweithwyr i wneud yr un peth. Rhaid i chi drin eich cydweithwyr mewn ffordd deg a gyda pharch. Ni ddylech eu bwlio neu eu poenydio neu wahaniaethu yn eu herbyn mewn ffordd annheg. Dylech herio ymddygiad cydweithwyr nad ydynt yn cyflawni’r safon hon.

Rhaid i chi ddilyn polisïau eich sefydliad ynghylch cyflogaeth, cydraddoldeb ac amrywiaeth, a bod yn ymwybodol o’r datblygiadau diweddaraf mewn perthynas â’r rhain. Rhaid i chi sicrhau cyngor am y materion hyn yn ôl yr angen.

Rhaid i chi hyrwyddo cydraddoldeb ac amrywiaeth trwy greu neu gynnal amgylchedd gwaith cadarnhaol sy’n rhydd rhag gwahaniaethu, bwlio ac aflonyddu. Rhaid i chi sicrhau bod polisïau’ch sefydliad am gyflogaeth a chydraddoldeb ac amrywiaeth yn cynnwys y wybodaeth ddiweddaraf a’u bod yn adlewyrchu’r gyfraith.³ 

Rhaid i chi sicrhau eich bod yn cyfleu gwybodaeth berthnasol mewn ffordd eglur i:

1. gydweithwyr yn eich tîm
2. cydweithwyr mewn gwasanaethau eraill yr ydych yn gweithio gyda nhw
3. cleifion a’r rhai y maent yn agos iddynt mewn ffordd y gallant ei deall, gan nodi pwy y bydd modd iddynt gysylltu â nhw os bydd ganddynt gwestiynau neu bryderon. Mae hyn yn arbennig o bwysig pan rennir gofal cleifion rhwng timau.

Ni ddylech gymryd y bydd rhywun arall yn y tîm yn trosglwyddo’r wybodaeth angenrheidiol ar gyfer gofal claf. Dylech wneud yn siŵr os nad ydych yn eglur ynghylch y cyfrifoldeb dros gyfleu gwybodaeth, gan gynnwys yn ystod trosglwyddiadau, i aelodau’r tîm gofal iechyd, gwasanaethau eraill sy’n ymwneud gyda darparu gofal a’r rhai sy’n agos atynt.

Dylech annog aelodau’r tîm i gydweithio a cyfathrebu mewn ffordd effeithiol gyda’i gilydd a gyda thimau neu gydweithwyr eraill y maent yn gweithio gyda nhw. Os byddwch yn nodi problemau sy’n codi oherwydd cyfathrebu gwael neu gyfrifoldebau aneglur o fewn timau neu rhwng timau, dylech gymryd camau i ddelio gyda’r rhain.

Rhaid i chi ddarparu gwybodaeth angenrheidiol ac amserol i’r rhai yr ydych yn eu rheoli, er mwyn iddynt allu cyflawni eu rolau mewn ffordd effeithiol. Yn ogystal, dylech gyfleu unrhyw wybodaeth berthnasol i reolwyr uwch a sicrhau bod trefniadau yn cael eu gwneud er mwyn trosglwyddo gwybodaeth berthnasol i’r tîm ar fyrder.

Rhaid i chi deimlo’n fodlon bod systemau mewn grym i gyfleu gwybodaeth am ofal cleifion.

Ar y cyd gyda’ch cyflogwr, dylech bennu cwmpas eich rôl a’r cyfrifoldebau y mae’ch rôl yn eu cynnwys mewn ffordd eglur, gan gynnwys cyfrifoldebau anghlinigol. Dylech godi unrhyw faterion y ceir ansicrwydd neu amwysedd yn eu cylch ac y maent yn ymwneud gyda chyfrifoldebau, gan gynnwys o fewn timau amlddisgyblaethol neu aml-asiantaeth, er mwyn egluro:

1. trefniadau goruchwylio ar gyfer staff a llinellau atebolrwydd ar gyfer y gofal a ddarparir i gleifion unigol (am ragor o wybodaeth am oruchwyliaeth, gweler paragraphs 60 - 62 yr arweiniad hwn) 
2. pwy ddylai gyflawni rolau arweiniol neu ymgymryd â chyfrifoldebau rheoli llinell
3. y sawl sy’n gyfrifol am ansawdd a safon y gofal a ddarparir gan y tîm.

Os ydych yn gyfrifol am arwain neu reoli tîm, rhaid i chi sicrhau bod staff yn eglur ynghylch:

1. eu rolau a’u hamcanion unigol ac fel tîm
2. eu cyfrifoldebau personol ac ar y cyd dros ddiogelwch cleifion a’r cyhoedd
3. eu cyfrifoldebau personol ac ar y cyd dros gofnodi a thrafod problemau mewn ffordd onest.

Dylech chi:

1. gyfrannu at y gwaith o sefydlu a chynnal systemau er mwyn nodi a rheoli risgiau o fewn maes cyfrifoldeb y tîm
2. sicrhau bod holl aelodau’r tîm yn cael cyfle i gyfrannu at drafodaethau
3. sicrhau bod aelodau’r tîm yn deall y penderfyniadau sy’n cael eu gwneud a’r broses er mwyn eu gweithredu
4. sicrhau bod gofal pob claf yn cael ei gydlynu a’i reoli mewn ffordd gywir.

Rydych yn atebol i CMC dros eich ymddygiad eich hun ac unrhyw gyngor meddygol y byddwch yn ei roi. Mae hyn yn cynnwys adegau pan fyddwch yn aelod o gorff sy’n gwneud penderfyniadau ar gyfer sefydliad iechyd neu ofal cymdeithasol, megis ysbyty neu fwrdd iechyd.

Os byddwch chi, fel aelod o fwrdd neu gorff tebyg, yn pryderu y byddai penderfyniad yn golygu y byddai cleifion neu iechyd y gymuned ehangach mewn perygl o ddioddef niwed difrifol, dylech godi’r mater gyda’r cadeirydd ar fyrder. Yn ogystal, rhaid i chi ofyn bod eich gwrthwynebiadau yn cael eu cofnodi’n ffurfiol a dylech ystyried cymryd camau pellach yn unol â’n harweiniad yn Mynegi pryderon a ddiogelwch cleifion a chymryd camau ⁴