Gwybodaeth am ‘Reol 12’

Beth yw ‘Rheol 12’?

Os ydych eisoes wedi mynegi pryder am addasrwydd meddyg i ymarfer ond nad ydych yn meddwl ein bod ni wedi dod i'r penderfyniad iawn, neu fod gennych wybodaeth newydd i'w darparu, gallwch ofyn i ni adolygu ein penderfyniad o dan ein proses adolygu fewnol (‘Rheol 12’).

Beth allwn ni eu hadolygu? 

Gallwn adolygu’r penderfyniadau canlynol o dan Reol 12 yn ein Rheolau Addasrwydd i Ymarfer.

• Pan fyddwn wedi penderfynu peidio ag ymchwilio i'r pryderon a godwyd gennych.
• Pan nad ydym wedi cymryd unrhyw gamau ar ddiwedd ymchwiliad.
• Pan fyddwn wedi cau ymchwiliad drwy roi cyngor, cytuno ar ymgymeriadau neu roi rhybudd i'r meddyg.

Dysgwch am y camau y gallwn eu cymryd ar ôl i feddyg gofrestru. 

Sylwch na allwn adolygu penderfyniadau sy’n ymwneud ag unigolion nad ydynt yn feddygon (er enghraifft, cymdeithion meddygol, cymdeithion anaesthesia, neu feddygon nad ydynt ar ein cofrestr mwyach) o dan y broses hon. Os yw'r penderfyniad yn ymwneud â chydymaith meddygol neu gydymaith anaesthesia, gallwch gael rhagor o wybodaeth am y broses ymchwilio neu gallwch gysylltu â feedback@gmc-uk.org.  

Pryd fyddwn yn adolygu penderfyniad?

Dim ond os yw’r canlynol yn berthnasol y gallwn adolygu penderfyniad dan Reol 12:

• mae’n bosibl fod gwall sylweddol yn y penderfyniad, neu fod gwybodaeth newydd a allai fod wedi arwain at benderfyniad gwahanol,
• mae adolygiad yn angenrheidiol er mwyn diogelu'r cyhoedd, er mwyn atal anghyfiawnder i’r ymarferydd, neu mae’n angenrheidiol er budd y cyhoedd,
• cafodd y penderfyniad ei wneud lai na dwy flynedd yn flaenorol (oni bai fod yr amgylchiadau’n eithriadol).

Pwy all ofyn am adolygiad? 

Gall unrhyw un sydd â diddordeb yn y penderfyniad ofyn am adolygiad – fel y meddyg y cwynir amdano neu’r sawl a wnaeth y gŵyn. 
Sylwch, dim ond ar gyfer pryderon y mae'r GMC eisoes yn ymwybodol ohonynt y mae’r adolygiad hwn. Os ydych yn dymuno mynegi pryder newydd am feddyg cofrestredig, gallwch roi gwybod am bryder newydd.

Gallwch ddarllen mwy am ein proses yn ein dogfen Cwestiynau Cyffredin am Reol 12.