Ein timau

Mae rolau gyrfaoedd cynnar gyda ni yn cynnig cyfle gwych i greu dechrau ystyrlon a gwerth chweil i daith broffesiynol gyda ni.  

Yr hyn y byddwch chi’n ei wneud: Drwy raglenni wedi eu teilwra, byddwch yn datblygu sgiliau, profiad a gwybodaeth mewn amgylchedd cyfeillgar a chefnogol – ac ar y ffordd i fod yn rhan o’n dyfodol. 

Mae prentisiaethau yn adeiladu’r sgiliau ar gyfer rôl gyntaf gyda ni neu ar gyfer newid gyrfa. Mae prentisiaid sy’n cymhwyso gyda ni fel arfer yn sicrhau swydd gynnar barhaol yn eu maes arbenigedd ac yn mynd ymlaen i ddatblygu eu taith broffesiynol gyda ni. 

Mae interniaid yn datblygu amrywiaeth sylweddol o sgiliau cyflogadwyedd. Os ydych chi yn eich dwy flynedd olaf yn y brifysgol mewn unrhyw bwnc gradd (neu gyfwerth) ac yn awyddus i ddeall sut beth yw gweithio i reoleiddiwr gofal iechyd, mae’n bosibl mai dyma'r dewis iawn i chi. 

Bydd angen i chi fod â brwdfrydedd a diddordeb mewn gwneud gwahaniaeth, bod yn drefnus a gallu gweithio mewn tîm, a bod yn gyfforddus wrth feithrin perthynas ag amrywiaeth eang o bobl. 

Yn gyfnewid am hyn, rydyn ni’n darparu:

• mentora
• mynediad at ddysgu ar-lein a hyfforddiant wyneb yn wyneb
• cyfarfodydd rheolaidd gyda’ch rheolwr i drafod eich cynnydd a’ch anghenion datblygu
• adborth a chydnabyddiaeth o’ch cyfraniadau
• cymorth gan gymheiriaid a llawer mwy.

Mae ein timau gweinyddol a chymorth yn darparu gwasanaethau a chymorth hanfodol i dros 1,600 o staff ac i 1,900 o gymdeithion.

• Mae ein tîm Pobl yn gofalu am faterion sy’n ymwneud â staff, y gyflogres, recriwtio, dysgu a datblygu, a threfniadau contract ar gyfer cymdeithion.
• Mae ein tîm Cyllid yn gyfrifol am dalu staff, prosesu treuliau, gweinyddu’r gwaith o brynu nwyddau a gwasanaethau, a phrosesu ffioedd.
• Mae ein tîm Cyfleusterau yn rheoli ein saith adeilad ledled y Deyrnas Unedig. Maent yn gweithio i ddarparu cyfarfodydd a logisteg ystafelloedd, rheoli ymwelwyr sy’n dod i mewn, dogfennu gwasanaethau, iechyd a diogelwch, a gweithdrefnau brys.
• Mae tîm ein Canolfan Gyswllt yn delio â thros 180,000 o alwadau a negeseuon e-bost bob blwyddyn, gan feddygon, cymdeithion meddygol, cymdeithion anesthesia, cyflogwyr ac aelodau o’r cyhoedd. Maent yn defnyddio’r dechnoleg ddiweddaraf o’u cartrefi neu o’r swyddfa.
• Mae ein timau cymorth busnes yn helpu i gysylltu gwahanol rannau o’r sefydliad ac yn darparu amrywiaeth eang o gymorth gweinyddol.
  
   

Mae ein timau arbenigol yn defnyddio eu gwybodaeth a’u harbenigedd i ddatblygu atebion polisi a gweithdrefnau sy’n diwallu anghenion y bobl rydyn ni’n eu gwasanaethu.

Rhagor o wybodaeth am rai o'r timau hyn, a'r hyn y gallech chi fod yn ei wneud pe byddech chi'n ymuno â nhw.

Cofrestru a thimau ailddilysu

Mae’r timau hyn yn delio ag ymholiadau, yn prosesu cofrestriadau, ac yn rheoli trwyddedu ac ailddilysu ar gyfer meddygon, cymdeithion meddygol a chymdeithion anaesthesia. Maent yn sicrhau bod gweithwyr proffesiynol yn bodloni’r gofynion angenrheidiol i ymarfer yn ddiogel yn y Deyrnas Unedig.

Yr hyn y byddwch chi’n ei wneud: Mae ein Canolfan Gyswllt yn delio ag ymholiadau cwsmeriaid y Cyngor Meddygol Cyffredinol, yn diweddaru manylion, ac yn prosesu Tystysgrifau Statws Proffesiynol Presennol (CCPS). Mae’r Tîm Cyflwyno Asesiadau yn rheoli arholiadau ar gyfer meddygon, cymdeithion meddygol a chymdeithion anesthesia, ac mae’r Tîm Datblygu Asesiadau yn cynnal cynnwys asesiadau. Mae’r Tîm Ceisiadau Rhyngwladol yn goruchwylio’r broses o gofrestru ar gyfer graddedigion Ewropeaidd a thramor, ac mae’r Tîm Ailddilysu yn delio â thrwyddedu, ailddilysu ac apeliadau. Mae’r Tîm Ceisiadau Arbenigol yn prosesu ceisiadau cofrestr arbenigol a cheisiadau cofrestr meddygon teulu, ac mae’r Tîm VERL yn rheoli newidiadau cofrestru, tynnu enw'n wirfoddol, a diweddariadau trwydded ar gyfer meddygon, cymdeithion meddygol a chymdeithion anesthesia.

Polisi

Mae’r timau hyn yn datblygu polisi neu strategaeth greadigol, gymesur, pragmatig sy’n seiliedig ar dystiolaeth. Maent yn gwneud yn siŵr bod ein prosesau a’n canllawiau yn ategu’r gwaith o gyflawni ein rhaglen polisi rheoleiddio a’n strategaeth gyffredinol. 

Beth fyddwch chi’n ei wneud: fe fyddwch chi’n gweithio’n agos gyda chydweithwyr a rhanddeiliaid allanol i gyflawni ein strategaeth gorfforaethol, ein cynlluniau busnes neu ein polisïau sector-benodol. Gallech helpu i osod safonau ar gyfer darparwyr addysg, fel bod graddedigion a meddygon dan hyfforddiant yn cyflawni’r canlyniadau a ddisgwylir ganddynt. Neu ymchwil, ymgynghori a dadansoddi i ddatblygu polisi, canllawiau ac adnoddau.

Rheoli prosiectau

Mae’r timau hyn yn gweithio i sicrhau bod rhaglenni a phrosiectau allweddol yn cael eu cyflawni’n llwyddiannus, ac yn eiriol dros newid a gwella.

Beth fyddwch chi’n ei wneud: fe fyddwch chi’n rheoli neu’n cynorthwyo’r gwaith o gyflawni prosiectau sydd wedi eu neilltuo o fewn amserlenni ac yn unol â’r gyllideb yn llwyddiannus, yn seiliedig ar anghenion busnes. Gall prosiectau ganolbwyntio ar newidiadau i’n fframwaith cyfreithiol, neu ailddylunio ein prosesau a’n gwasanaethau. Byddwch yn cynhyrchu ac yn monitro dogfennau a chynlluniau prosiectau ac yn ymgysylltu’n rhagweithiol ag amrywiaeth eang o randdeiliaid, gan gydweithio i rannu gwybodaeth a syniadau.

Materion cyfreithiol

Mae’r timau hyn yn cefnogi ymchwiliadau ac yn rheoli achosion, ac maent yn ffynhonnell ddibynadwy o arbenigedd, cyngor a hyfforddiant i helpu i sicrhau ein bod ni’n glynu wrth y gyfraith a’r rheoliadau perthnasol.

Yr hyn y byddwch yn ei wneud: gallech fod yn casglu tystiolaeth a llunio achosion i’w cyflwyno gerbron Pwyllgor Ymchwilio’r Gwasanaeth Tribiwnlys Ymarferwyr Meddygol a’r Tribiwnlys Cofrestru. Gallech hefyd fod yn atebol am ymgyfreitha – gan gynnwys amddiffyn ceisiadau am adolygiadau barnwrol ac apeliadau i’r Uchel Lys, gan gyfarwyddo’r Cwnsler fel bo’n briodol.

Ymchwilio

Os mynegir pryderon difrifol i ni am ymddygiad, iechyd neu berfformiad meddyg, cydymaith meddygol neu gydymaith anesthesia, gallwn ymchwilio i ganfod a yw diogelwch cleifion, neu hyder y cyhoedd yn yr unigolion hyn mewn perygl.

Beth fyddwch chi’n ei wneud: fe fyddwch chi’n rheoli ymchwiliadau, gan gynnwys achosion euogfarnau troseddol ac achosion sy’n debygol o gael eu hatgyfeirio i’r Gwasanaeth Tribiwnlys Ymarferwyr Meddygol. Fe fyddwch chi hefyd yn rheoli achosion sy’n ymwneud ag iechyd meddyg, cydymaith meddygol neu gydymaith anesthesia, neu’n cynghori cydweithwyr ar sut i ddelio â rhywun sy’n agored i niwed. Neu mae’n bosibl y byddwch chi'n rhan o dîm sy’n hyfforddi ac yn cynorthwyo gwelliannau yn y timau ymchwiliadau. 

Safonau a moeseg

Mae’r timau hyn yn helpu meddygon, cymdeithion meddygol, cymdeithion anesthesia a rhanddeiliaid allweddol i lywio penderfyniadau moesegol a chyfreithiol yn ymarferol, gan weithio ochr yn ochr â’n huwch arweinwyr yn aml.

Beth fyddwch chi’n ei wneud: pan fydd meddygon, cymdeithion meddygol a chymdeithion anesthesia yn gofyn i ni eu helpu i wneud y penderfyniadau cywir a llywio drwy sefyllfaoedd anodd, byddwch chi a’r tîm yn cyfieithu ac yn dehongli ein polisïau, ac yn ymgynghori ag eraill i ddod o hyd i’r atebion cywir i’w cwestiynau.

Cyfathrebu ac ymgysylltu

Mae’r timau hyn yn helpu i gynyddu effaith ein gwaith ac yn cryfhau ein hymgysylltiad â chwsmeriaid a phartneriaid i gyflawni ein gwaith fel rheoleiddiwr. 

Beth fyddwch chi’n ei wneud: fe fyddwch chi’n gweithio i ymgysylltu â’n cynulleidfaoedd targed, gan gael cipolwg ar eu hanghenion, a dylanwadu ar ymddygiad drwy ein sianeli cyfathrebu. Fel rhan o hyn, mae'n bosibl y byddwch chi’n rheoli cysylltiadau â chyrff cenedlaethol ym mhob un o wledydd y Deyrnas Unedig. Yn gyffredinol, fe fyddwch chi’n sicrhau bod yr hyn rydyn ni’n ei ddweud yn gyson ac yn gydlynol ac yn cynrychioli ein gwaith yn gadarnhaol ac yn gywir.

Mae ein timau data a thechnoleg yn darparu cymorth technegol arbenigol ar gyfer datblygu gwybodaeth o’n data ac i redeg ein systemau yn y ffyrdd mwyaf effeithlon.

Systemau gwybodaeth

Mae ein timau systemau gwybodaeth yn frwd dros dechnoleg. Maent yn gweithio i reoli a chefnogi ein systemau cyfrifiadurol a chysylltedd yn y ffyrdd mwyaf effeithlon. 

Beth fyddwch chi’n ei wneud: fe fyddwch chi’n cyfrannu at ddarparu portffolio arloesol o dechnoleg, gan gynnwys mewn meysydd fel rhaglennu, newid busnes, diogelwch gwybodaeth a chydymffurfiaeth, archifo digidol, cronfeydd data a rhaglenni gwe. Fe fyddwch chi’n rhan o dîm sy’n gweithio gydag amrywiaeth eang o bobl ar draws y sefydliad i gynllunio systemau ar gyfer ein dyfodol. 

Data, ymchwil a mewnwelediad

Mae ein timau data, ymchwil a gwybodaeth yn helpu uwch-wneuthurwyr penderfyniadau mewnol, timau polisi a rhanddeiliaid allanol i wneud penderfyniadau cadarn sy’n seiliedig ar dystiolaeth. 

Beth fyddwch chi’n ei wneud: fe fyddwch chi’n cynhyrchu tystiolaeth briodol a defnyddiol yn gyflym, yn adeiladu dangosfyrddau data, yn cynnal gwaith ymchwil a gwerthuso, ac yn datblygu gwybodaeth o ddeallusrwydd ansoddol a meintiol.

Mae gan ein swyddogion cyswllt yn y GMC gefndiroedd meddygol a heb fod yn feddygol, ac maent yn cyfrannu eu harbenigedd at helpu i gyflawni ein swyddogaethau allweddol. 

Mae nifer o rolau gwahanol y gall aelodau o’r cyhoedd, gweithwyr proffesiynol sydd â chymwysterau cyfreithiol, meddygon, cymdeithion meddygol a chymdeithion anaesthesia wneud cais amdanynt.

Maent yn cynorthwyo ein gwaith mewn llawer o wahanol ffyrdd – er enghraifft: 

• cymryd rhan mewn tribiwnlysoedd sy’n gyfrifol am asesu apeliadau ynghylch ein prosesau cofrestru neu ymchwilio
• ymuno ag ymweliadau sicrhau ansawdd i adolygu gwaith ysgolion meddygol, cymdeithion meddygol, cymdeithion anesthesia, darparwyr cyrsiau, deoniaethau ac awdurdodau iechyd 
• asesu gallu meddyg, cydymaith meddygol neu gydymaith anesthesia i ymarfer yn ddiogel oherwydd perfformiad neu salwch
• arholi ymgeiswyr sydd am ymarfer meddygaeth yn y Deyrnas Unedig, neu helpu i ddatblygu deunyddiau asesu 
• darparu cyngor i gynorthwyo ein swyddogaethau rheoleiddio.

Rhagor o wybodaeth am ein proses recriwtio cydymaith.

I gael yr wybodaeth ddiweddaraf pan fyddwn ni’n chwilio am aelodau cyswllt newydd i gynorthwyo ein gwaith, anfonwch e-bost at associateservices@gmc-uk.org.

Mae Gwasanaeth Tribiwnlys Ymarferwyr Meddygol yn cynnal gwrandawiadau sy’n gwneud penderfyniadau annibynnol ynghylch a yw meddygon, cymdeithion meddygol a chymdeithion anesthesia yn addas i ymarfer yn y Deyrnas Unedig. Mae’n gweithredu ar wahân i rôl ymchwilio’r Cyngor Meddygol Cyffredinol (GMC).

Gall ei dribiwnlysoedd gyfyngu ar ymarfer meddyg, cydymaith meddygol neu gydymaith anesthesia, neu eu hatal rhag gweithio yn y Deyrnas Unedig.

Mae holl dribiwnlysoedd MPTS yn cynnwys pobl sydd wedi cofrestru a phobl leyg (heb eu cofrestru), ac fe’u penodir yn aelodau o dribiwnlysoedd MPTS. Mae cofrestrai yn rhywun sydd wedi ei gofrestru gyda’r Cyngor Meddygol Cyffredinol ac sy’n dal trwydded i ymarfer.

Mae gan y Gwasanaeth Tribiwnlys Ymarferwyr Meddygol tua 300 o gymdeithion sy’n dod â rhychwant eang o safbwyntiau amrywiol i’r rôl. Gweld y rhestr gyfredol o aelodau tribiwnlysoedd MPTS.

Penodir aelodau tribiwnlysoedd MPTS drwy gystadleuaeth agored ar sail cymwyseddau y cytunwyd arnynt. Rhaid i ymgeiswyr ddangos eu bod nhw’n bodloni’r cymwyseddau hyn, ac yn benodol:

• didwylledd amlwg
• y profiad a’r gallu i ddod i benderfyniadau ystyriol a diduedd sy’n effeithio ar bobl eraill.

Nid oes angen profiad blaenorol o eistedd ar dribiwnlysoedd i fod yn aelod o dribiwnlys, ar yr amod bod gennych chi’r cymwyseddau sy’n ofynnol ar gyfer y rôl. Ein blaenoriaeth yw penodi pobl sydd â’r sgiliau iawn.

Pan fyddwn ni’n recriwtio aelodau newydd o dribiwnlysoedd, byddwn yn hysbysebu’r swyddi gwag ar ein gwefan, ac mewn cyhoeddiadau perthnasol eraill.

Os hoffech chi gofrestru eich diddordeb mewn dod yn aelod o dribiwnlys, yn gadeirydd cyfreithiol neu’n asesydd cyfreithiol, anfonwch e-bost at tribunalappointment@mpts-uk.org, gan nodi a ydych chi’n ymgeisydd meddygol, lleyg neu gyfreithiol. Byddwn yn rhoi gwybod i chi pan fyddwn ni wrthi’n penodi.

Sut beth yw bod yn aelod o dribiwnlys yr MPTS?