Beth yw lleoliadau clinigol?
Mae lleoliadau clinigol yn flociau amser wedi’u cynllunio fel rhan o’ch gradd feddygol lle rydych yn mynd i leoliad iechyd neu ofal cymdeithasol at ddibenion addysgol.
Mae’r rhain yn gyfleoedd pwysig i gael profiad ymarferol mewn amrywiaeth o arbenigeddau a lleoliadau, a’r cyfle i ryngweithio ag amrywiaeth eang o gleifion.
Maent wedi’u cynllunio i’ch arfogi â’r wybodaeth, y sgiliau a’r ymddygiad y bydd eu hangen arnoch fel meddyg sydd newydd gymhwyso, fel y nodir yn ein Deilliannau i raddedigion (Saesneg yn unig).
Ble bydd eich lleoliadau clinigol yn cael eu cynnal?
Gall lleoliadau clinigol ddigwydd mewn lleoliadau gofal sylfaenol, eilaidd, cymunedol neu leoliadau iechyd a gofal cymdeithasol eraill, gyda rhai agweddau’n ymwneud ag ymgynghoriadau o bell. Nid ydynt wedi’u cyfyngu i’r amgylcheddau y mae meddygon yn gweithio ynddynt ond dylent gynnwys timau amlddisgyblaethol ehangach.
Gallwch ddisgwyl cael profiadau ar draws amrywiaeth o leoliadau. Gall hyn gynnwys lleoliadau trefol a gwledig, ysbytai cyffredinol dosbarth ac ysbytai trydyddol, a lleoliadau cymunedol a rhai yn y trydydd sector.
Dylai eich ysgol feddygol gynnig cymorth ar gyfer costau sy’n gysylltiedig â mynd ar leoliad ym mhell i ffwrdd. Er enghraifft, costau teithio os oes pellter afresymol rhwng y lleoliad a'ch llety yn ystod y tymor.
Dywedodd myfyrwyr meddygol wrthym eu bod yn cael y profiadau gorau ar leoliad clinigol dan yr amgylchiadau canlynol:
- 'Cawsom ein hintegreiddio’n llawn ac roeddem yn teimlo ein bod yn rhan o’r tîm.'
- ‘Roedd yna amserlen glir a chynhwysfawr o weithgareddau clinigol ac addysgu.’
- ‘Arsylwyd arnom wrth ymgymryd â sgiliau clinigol a rhoddwyd adborth i ni.’
- 'Roeddem yn gallu rhoi adborth ar sut roedd y lleoliad yn mynd.’
- ‘Roeddem yn gwybod at bwy i droi am gymorth.’
