Gwybodaeth am y canllawiau hyn

Bydd eich astudiaethau’n dod â chi i gysylltiad â chleifion ac aelodau o’r cyhoedd, sy'n gallu bod yn agored i niwed yn gorfforol ac yn emosiynol. Oherwydd hyn, a’r ffaith y byddwch chi’n ymuno â phroffesiwn mae pobl yn ymddiried ynddo, rydym ni’n disgwyl i chi ddeall bod gwahaniaeth yn y safonau ymddygiad sy’n ddisgwyliedig gan fyfyrwyr ar gyrsiau sy’n dod â nhw i gysylltiad â chleifion a’r cyhoedd.

Yn benodol, rhaid i’ch ymddygiad yn yr amgylchedd clinigol a’r tu allan i’ch astudiaethau, bob amser gyfiawnhau’r hyder y mae cleifion a’r cyhoedd yn ei roi ynoch chi fel darpar feddyg. Byddwn ni a’ch ysgol feddygol yn eich cefnogi ar eich taith o fod yn fyfyriwr i fod yn feddyg, a fydd yn cynnwys addysgu ac asesiad ar broffesiynoldeb.

Fel myfyriwr meddygaeth graddedig, bydd angen i chi gofrestru gyda’r GMC a chael trwydded i ymarfer cyn y gallwch chi ddechrau gweithio fel meddyg os ydych chi eisiau gweithio yn y DU. Ni fydd y GMC yn cofrestru graddedigion meddygaeth sydd ddim yn addas i ymarfer meddygaeth.

Yn ogystal â’r canllawiau hyn, rydym ni hefyd wedi paratoi canllawiau ar gyfer ysgolion meddygol a myfyrwyr meddygol ar reoli pryderon yn ymwneud â phroffesiynoldeb ac addasrwydd i ymarfer. Maen nhw’n amlinellu'r prosesau y dylai ysgolion meddygol eu dilyn os ydynt yn poeni am broffesiynoldeb neu addasrwydd myfyrwyr i ymarfer yn eu proffesiwn.

Mae enghreifftiau o’r mathau o ymddygiad sy’n peri pryder ac a allai at brosesau ffurfiol yn cael eu defnyddio wedi’u hamlinellu yn adran Proffesiynoldeb - meysydd pryder allweddol y canllawiau hyn.

Mae Arfer meddygol da yn gosod yr egwyddorion, gwerthoedd, a’r safonau gofal ac ymddygiad proffesiynol sy’n ddisgwyliedig gan bob meddyg sydd wedi cofrestru gyda'r GMC, yn ogystal â chymdeithion meddygol a chymdeithion anesthesia unwaith y bydd rheoleiddio’n cychwyn. Mae’n fframwaith moesegol, sy’n eu helpu i ddarparu gofal diogel o safon dda, er budd cleifion. Rydym ni’n gweithio’n agos gyda meddygon, cymdeithion meddygol, cymdeithion anesthesia, cleifion a phobl eraill i ddatblygu Arfer meddygol da, felly mae’n gytundeb ar y cyd o’r hyn y dylai safonau proffesiynol fod.

Mae disgwyl i feddygon sydd wedi cofrestru gyda’r GMC fod yn gyfarwydd ag Arfer meddygol da, a defnyddio'r canllawiau wrth wneud penderfyniadau gyda chleifion am eu gofal. Rhaid i feddygon ddefnyddio eu crebwyll proffesiynol i ddefnyddio’r safonau yn Arfer meddygol da wrth ymarfer o ddydd i ddydd. Mae hyn yn golygu penderfynu pa rai o’r safonau proffesiynol sy’n berthnasol i’r amgylchiadau penodol maen nhw’n eu hwynebu, a defnyddio eu gwybodaeth, sgìl a phrofiad i’w dilyn yn y cyd-destun hwnnw. Rhaid i feddygon weithredu’n ddidwyll ac er budd cleifion, a bod yn barod i egluro a chyfiawnhau eu penderfyniadau a’u gweithredoedd.

Mae angen meddygon da ar gleifion - mae hyfforddi i fod yn feddyg da yn cychwyn fel myfyriwr meddygol. Yn ystod eich astudiaethau, byddwch chi’n dysgu am bwysigrwydd proffesiynoldeb a'r egwyddorion a’r gwerthoedd sy’n cael eu nodi yng nghanllawiau craidd y GMC ar gyfer meddygon, cymdeithion meddygol a chymdeithion anesthesia - Arfer meddygol da - a’r canllawiau manylach sy’n eu cefnogi.

Yn y canllawiau hyn, mae’r GMC a’r Cyngor Ysgolion Meddygol (sy’n cael eu galw’n ‘ni’ yn y canllawiau) yn dangos sut mae’r egwyddorion a’r gwerthoedd yn Arfer meddygol da yn berthnasol i chi fel myfyrwyr meddygol, i helpu i’ch paratoi ar gyfer eich dyfodol fel meddyg. Mae llawer o’r canllawiau hyn yn berthnasol yn benodol i’ch gwaith ar leoliadau clinigol Ond mae proffesiynoldeb yn ehangach na hyn ac mae’n cynnwys pob elfen o’ch astudiaeth academaidd, yn ogystal ar angen i fod yn ddibynadwy a gonest.

Yn y canllawiau hyn, rydym ni’n defnyddio’r termau ‘rhaid i chi’ a ‘dylech chi’ yn y ffyrdd canlynol.

• Mae ‘rhaid i chi’ yn cael ei ddefnyddio i amlinellu meysydd pwysig sydd â chysylltiad cryf ag Arfer meddygol da, o ran y dyletswyddau cyfreithiol neu foesegol y mae disgwyl i chi eu bodloni (neu allu cyfiawnhau pam na wnaethoch chi).
• Mae ‘dylech’ chi yn cael ei ddefnyddio i ddangos dyletswyddau neu egwyddorion yn Arfer meddygol da sydd:
• ddim yn berthnasol i chi neu i’r sefyllfa rydych chi ynddi, neu
• nad ydych chi’n gallu cydymffurfio â nhw oherwydd ffactorau y tu hwnt i’ch rheolaeth.

Trwy’r canllawiau hyn, rydym ni hefyd yn cynnig rhagor o fanylion ac awgrymiadau ymarferol ar sut y gallwch chi fodloni’r gofynion rydym ni’n eu gosod. Mae’r blwch isod yn enghraifft o hyn.