Atodiad – Dyfyniadau o Arfer meddygol da

47. Dim ond pan fydd diffyg ymddiriedaeth rhyngoch chi a’r claf yn golygu na allwch barhau i ddarparu gofal clinigol da iddynt y dylech ddod â pherthynas broffesiynol gyda’r claf i ben. Rhaid i chi ddilyn ein canllaw mwy manwl am Derfynu’ch perthynas broffesiynol gyda chlaf.

19. Rhaid i chi drin cleifion yn deg.  Rhaid i chi beidio â gwahaniaethu yn eu herbyn na chaniatáu i’ch safbwyntiau personol effeithio ar eich perthynas gyda nhw, na’r driniaeth rydych yn ei darparu neu’n ei threfnu.  Rhaid i chi beidio â gwrthod neu oedi triniaeth oherwydd eich bod yn credu bod gweithredoedd neu ddewisiadau claf wedi cyfrannu at ei gyflwr. 

33. Rhaid i chi ystyried ac ymateb i anghenion cleifion sydd â namau neu anableddau.  Nid yw pob nam ac anabledd yn hawdd i’w adnabod, felly dylech ofyn i gleifion pa gymorth y mae ei angen arnynt, a chynnig addasiadau rhesymol sy’n gymesur â’r amgylchiadau. 

56. Rhaid i chi beidio â difrïo, gwahaniaethu yn erbyn, bwlio nac aflonyddu ar unrhyw un ar sail ei nodweddion personol, neu am unrhyw reswm arall.  Mae ‘nodweddion personol’ yn golygu ymddangosiad rhywun, ei ffordd o fyw, ei ddiwylliant, ei statws cymdeithasol neu economaidd, neu unrhyw rai o’r nodweddion a warchodir gan ddeddfwriaeth – oedran, anabledd, ailbennu rhywedd, hil, priodas a phartneriaeth sifil, beichiogrwydd a mamolaeth, crefydd neu gred, rhyw a chyfeiriadedd rhywiol. 

65. Mae parhad gofal yn bwysig i bob claf, ond yn enwedig i’r rhai sy’n ei chael hi’n anodd dilyn eu llwybr gofal iechyd eu hunain neu eirioli dros eu hunain.  Mae parhad yn arbennig o bwysig pan fydd gofal yn cael ei rannu rhwng timau, rhwng gwahanol aelodau o’r un tîm, neu pan fydd cleifion yn cael eu trosglwyddo rhwng darparwyr gofal. 

I gyfrannu at barhad gofal, rhaid i chi wneud y canlynol: 

1. rhannu’r holl wybodaeth berthnasol am gleifion (gan gynnwys unrhyw addasiadau rhesymol a dewisiadau o ran cymorth cyfathrebu) gydag eraill sy’n ymwneud â’u gofal, o fewn ac ar draws timau, yn ôl y gofyn 
2. rhannu gwybodaeth gyda chleifion am; 
   1. cynnydd eu gofal 
   2. pwy sy’n gyfrifol am ba agwedd o’u gofal 
   3. enw’r tîm neu’r clinigydd arweiniol sydd â chyfrifoldeb cyffredinol dros eu gofal 

3. bod yn hyderus bod y wybodaeth sy’n angenrheidiol ar gyfer gofal parhaus wedi cael ei rhannu;
   1. cyn i chi fynd oddi ar ddyletswydd 
   2. cyn i chi ddirprwyo gofal, neu 
   3. cyn i chi gyfeirio’r claf at ddarparwr iechyd neu ofal cymdeithasol arall 

4. sicrhau, pan fo hynny’n ymarferol, bod tîm neu glinigydd penodol wedi ymgymryd â’r cyfrifoldeb pan fydd eich rôl gyda gofal claf wedi dod i ben.