Ein ffocws

Cefnogi gofal da a diogel i gleifion

Byddwn yn gweithio gydag eraill i greu amgylcheddau gofal iechyd sy'n gynhwysol, cefnogol a theg.

Rydym wedi gosod pum amcan strategol i gyflawni ein nod o gefnogi gofal da a diogel i gleifion. 

Hyrwyddo arferion da 

Ein nod yw cefnogi meddygon, cymdeithion meddygol, cymdeithion anaesthesia, a myfyrwyr mewn ffordd sy'n berthnasol i'r heriau maen nhw'n eu hwynebu ac sy'n eu helpu i ddeall a chymhwyso'r safonau proffesiynol yn eu gwaith.  

Byddwn wedi llwyddo os byddwn yn cynnal canfyddiadau cadarnhaol o eglurder, perthnasedd a chymorth ein safonau, ein cyngor a'n hallgymorth. Bydd mwy o'r gweithwyr proffesiynol rydym yn eu rheoleiddio hefyd yn cytuno, mewn ymateb i'n harolygon, ein bod yn eu cefnogi i ddarparu gofal da a diogel. 

Gweithio gydag eraill i wella diwylliannau yn y gweithle a mynd i'r afael ag anghydraddoldebau yn y gweithlu

Ein nod yw gweithio gydag eraill fel ein bod, gyda'n gilydd, yn effeithiol o ran gwella diwylliannau yn y gweithle, datblygu arweinyddiaeth glinigol, a mynd i'r afael ag anghydraddoldebau parhaus yn y gweithlu.

Byddwn wedi llwyddo os gallwn ddangos effeithiau pendant ein gwaith i fynd i'r afael â gwahaniaethu ac ymddygiad amhroffesiynol. Byddwn hefyd wedi cyflawni ein targedau presennol mewn perthynas ag atgyfeiriadau anghymesur gan gyflogwyr, a byddwn yn gwneud cynnydd da tuag at ddileu gwahaniaethu, anfantais ac annhegwch mewn addysg a hyfforddiant.

Annog datblygiad gyrfaol a dysgu gydol oes

Ein nod yw cael mwy o hyblygrwydd ac arloesedd mewn addysg a hyfforddiant, a mwy o ffocws ar ddysgu gydol oes. 

Pwrpas hyn yw sicrhau bod yr holl weithwyr proffesiynol rydym yn eu rheoleiddio, p'un a ydynt mewn hyfforddiant ffurfiol ai peidio, yn cael eu cefnogi'n well i ddatblygu'r sgiliau clinigol a phroffesiynol sy'n berthnasol i anghenion cleifion a'r cyhoedd ar draws amrywiaeth o leoliadau a sectorau. Bydd hefyd yn eu galluogi i gael gyrfaoedd boddhaus, a fydd yn helpu i gadw gweithwyr proffesiynol talentog yng ngweithlu’r DU. 

Rydym hefyd eisiau bod yn effeithiol yn ein gwaith gydag eraill i ddatblygu addysgwyr, hyfforddwyr a goruchwylwyr mwy amrywiol, sy'n cael eu cefnogi'n well. Mae hyn yn hanfodol er mwyn cynnal y llif o sgiliau clinigol ac arweinyddol y bydd eu hangen arnom yn y dyfodol.

Byddwn wedi llwyddo os bydd meddygon dan hyfforddiant yn parhau i roi sgôr uchel i ansawdd eu hyfforddiant, fel y mesurir drwy ein harolwg hyfforddiant cenedlaethol. Byddwn hefyd yn gweld tystiolaeth o well mynediad at gyfleoedd dysgu a datblygu i unigolion cofrestredig nad ydynt mewn rhaglenni hyfforddi ffurfiol. 

Rhannu ein data a'n gwybodaeth er mwyn sbarduno newid

Ein nod yw defnyddio a rhannu data, ymchwil a gwybodaeth berthnasol i gefnogi'r gwaith o ddatblygu polisïau a chynlluniau gofal iechyd lleol a chenedlaethol ledled y DU.

Byddwn wedi llwyddo os bydd ein rhanddeiliaid yn parhau i ddweud bod ein data, ein hymchwil a'n gwybodaeth yn eu helpu gyda'u gwaith. Byddwn hefyd yn gweld mwy o gytundeb ein bod yn canolbwyntio ar y materion iawn fel rheoleiddiwr. 

Cydweithio â phartneriaid gofal iechyd 

Fel rheoleiddiwr pedair gwlad, rydym yn ymgysylltu â phartneriaid ledled y DU i ddeall y cyd-destunau y maent yn gweithredu ynddynt ac i feithrin dealltwriaeth o'n gwaith. Rydym hefyd yn cydweithio â phartneriaid i wneud yn siŵr bod y safonau rydym yn eu gosod yn cael eu bodloni, a bod diogelwch cleifion yn cael ei gynnal. 

Ein nod yw bod yn effeithiol o ran sut rydym yn gweithio gydag eraill i gyflawni ein prosesau rheoleiddio. Rydym hefyd eisiau deall yn well yr amgylcheddau lle mae ein hunigolion cofrestredig yn ymarfer ac yn hyfforddi ynddynt, a gwneud yn siŵr bod ein blaenoriaethau'n parhau i fod yn berthnasol. 

Byddwn wedi llwyddo os bydd rhanddeiliaid yn parhau i ddweud ein bod yn gweithio'n dda gyda nhw ac eraill i gadw cleifion ac unigolion yn ddiogel. Byddwn hefyd yn gweld gwell canfyddiadau gan randdeiliaid ohonom fel sefydliad sy'n gwrando.

Cyflawni gwaith rheoleiddio gwell a thecach

Byddwn yn moderneiddio ein prosesau i'w gwneud yn gyflymach, yn decach ac mewn sefyllfa well i gefnogi arferion da.

Rydym wedi gosod pedwar amcan strategol i gyflawni ein nod o reoleiddio’n well ac yn decach. 

Gwella a chynnal tegwch yn ein penderfyniadau 

Ein nod yw sicrhau bod y penderfyniadau a wnawn yn dosturiol, yn deg ac yn gadarn. 

Byddwn wedi llwyddo os gallwn ddangos ein bod yn cydymffurfio â'r mesurau gwrth-ragfarn yr ydym wedi'u cyflwyno. Bydd gennym hefyd hyder bod y rhai sy'n gwneud penderfyniadau yn dangos yr ymddygiadau rydym am eu gweld. A byddwn yn dryloyw ynghylch sut rydym yn sicrhau tegwch ein penderfyniadau.

Diwygio rheoleiddio 

Ein nod yw sicrhau fframwaith deddfwriaethol mwy modern, hyblyg ac effeithiol a fydd yn ein galluogi i wneud ein prosesau'n gyflymach ac yn symlach, yn ogystal â bod yn fwy tosturiol, i'r bobl sy'n ymwneud â nhw. 

Byddwn wedi llwyddo os bydd y fframwaith deddfwriaethol newydd yn rhoi'r sail gyfreithiol i ni gyflawni ein swyddogaethau'n effeithiol a gallwn ddangos sut y bydd yn ein galluogi i wireddu manteision diwygio rheoleiddio.

Datblygu ein fframwaith addysg i ddiwallu anghenion iechyd amrywiol a newidiol y DU

Ein nod yw sicrhau bod y fframwaith a osodwyd gennym ar gyfer addysg a hyfforddiant meddygon, cymdeithion meddygol a chymdeithion anaesthesia yn berthnasol i anghenion a disgwyliadau newidiol cleifion, strwythur newidiol y gweithlu gofal iechyd, a gwasanaeth iechyd sy'n newid.

Mae hyn yn cynnwys y bydd y gweithwyr proffesiynol rydym yn eu rheoleiddio yn meddu ar y galluoedd sydd eu hangen i ofalu'n effeithiol am gleifion a chymunedau amrywiol ac i fynd i'r afael ag anghydraddoldebau gofal iechyd. Byddant hefyd yn gallu darparu gofal yn arloesol ac yn ddiogel, gan ddefnyddio technolegau newydd fel deallusrwydd artiffisial (AI). 

Byddwn wedi llwyddo os gallwn ddangos sut mae'r fframwaith addysg diwygiedig yn ymateb i anghenion newidiol cleifion. Byddwn hefyd yn gallu dangos sut y bydd yn helpu ein hunigolion cofrestredig i gael yr wybodaeth a'r sgiliau sydd eu hangen arnynt.

Parhau i ddatblygu a gwella ein prosesau rheoleiddio

Ein nod yw cynnal a datblygu ein dull o fod yn rheoleiddiwr effeithiol ar gyfer meddygon, cymdeithion meddygol a chymdeithion anaesthesia. Mae hyn yn golygu parhau i fod yn gadarn o ran sut rydym yn cyflawni ein cyfrifoldebau, gan fod yn deg, yn hyblyg, yn gymesur ac yn dosturiol o ran sut rydym yn trin y bobl sy'n ymwneud â'n prosesau. 

Byddwn wedi llwyddo os gallwn ddangos ein bod wedi llwyddo i gyflawni rhaglenni gwaith i ddatblygu a gwella ein prosesau rheoleiddio. Byddwn hefyd yn parhau i berfformio'n gryf yn erbyn ein dangosyddion perfformiad allweddol ac yn bodloni holl safonau'r Awdurdod Safonau Proffesiynol.

Sicrhau bod pob rhyngweithiad yn bwysig

Byddwn yn gwneud ein gwasanaethau'n hygyrch ac yn trin pawb â charedigrwydd, parch, ac effeithlonrwydd.

Rydym wedi gosod pedwar amcan strategol i gyflawni ein nod o sicrhau bod pob rhyngweithiad yn bwysig.  

Gwella ein gwasanaethau cwsmeriaid 

Ein nod yw sicrhau bod pawb, beth bynnag fo'u hanabledd, cefndir neu amgylchiadau, yn gallu deall a defnyddio ein gwasanaethau. Mae hyn yn cynnwys ei gwneud yn haws i bawb ymgysylltu â ni. Ac rydym eisiau gwneud yn siŵr eu bod yn cael profiadau clir, tosturiol a chyson pan fyddant yn gwneud hynny. 

Byddwn wedi llwyddo os byddwn yn cynnal y lefelau uchel presennol o foddhad cwsmeriaid. Byddwn hefyd yn gallu dangos ein bod fel mater o drefn yn gofyn am adborth ac yn gweithredu arno er mwyn gwella profiadau pobl sy’n defnyddio ein gwasanaethau.

Deall y bobl sy'n rhyngweithio â ni 

Ein nod yw deall yn well nodweddion amrywiol y bobl sy'n rhyngweithio â ni. Pwrpas hyn yw gwneud yn siŵr bod ein polisïau, ein gwasanaethau a'n prosesau'n effeithiol ac yn hygyrch. 

Byddwn wedi llwyddo os bydd ansawdd ein data ar y rheini sy'n rhyngweithio â ni yn gwella. Byddwn hefyd yn defnyddio'r ddealltwriaeth ddyfnach hon o'r rheini sydd â chefndiroedd amrywiol i wella profiadau a siapio ein gwasanaethau. 

Cynnwys pobl yn ein gwaith 

Ein nod yw parhau i gryfhau ein hymgysylltiad â phobl y mae ein gwaith yn effeithio arnynt. Mae hyn er mwyn i ni ddatblygu polisïau, gwasanaethau a phrosesau perthnasol, cynhwysol a chymesur sy'n seiliedig ar dystiolaeth. 

Byddwn wedi llwyddo os gallwn ddangos sut mae profiadau, disgwyliadau ac anghenion cleifion a gofalwyr, y cyhoedd, a'r gweithwyr proffesiynol rydym yn eu rheoleiddio wedi helpu i siapio ein gwaith.

Ei gwneud hi'n haws deall beth rydym yn ei wneud a pham

Ein nod yw cyfathrebu'n glir am ein rôl, lleihau'r ofn o'n prosesau addasrwydd i ymarfer, a meithrin ymddiriedaeth a hyder ein bod yn rheoleiddio mewn ffordd sy'n effeithiol, yn berthnasol ac yn dosturiol. 

Byddwn wedi llwyddo os byddwn yn cynnal canfyddiadau cadarnhaol o ansawdd ein cyfathrebiadau. Byddwn hefyd yn parhau i weld mwy o hyder yn y ffordd rydym yn rheoleiddio.

Bod yn sefydliad cynhwysol sy’n cael ei redeg yn dda

Byddwn yn buddsoddi yn ein pobl a'n diwylliant, ac yn defnyddio adnoddau’n gyfrifol, er mwyn cael yr effaith fwyaf bosibl.

Rydym wedi gosod pum amcan strategol i gyflawni ein nod o fod yn sefydliad cynhwysol sy'n cael ei redeg yn dda. 

Cryfhau ein harweinyddiaeth

Ein nod yw datblygu arweinwyr hyderus a chynhwysol sy'n hyrwyddo tegwch ac yn rheoli newid yn effeithiol. Pwrpas hyn yw meithrin gweithle teg, cynhwysol, tosturiol a chynhyrchiol lle mae pobl yn teimlo eu bod yn cael eu cefnogi, yn teimlo eu bod yn gallu gofyn cwestiynau a herio rhagdybiaethau yn eu gwaith, ac yn ffynnu. 

Byddwn wedi llwyddo os ydym wedi cyrraedd ein targedau cynrychiolaeth Cydraddoldeb, Amrywiaeth a Chynhwysiant, wedi cryfhau ein galluoedd arwain a rheoli newid, ac wedi gweld gwelliannau mewn sgoriau cynhwysiant.

Buddsoddi yn ein pobl i gyflawni 

Ein nod yw parhau i feithrin diwylliant agored a chefnogol sy'n blaenoriaethu llesiant ac yn helpu pobl i dyfu. Ein nod yw creu gweithlu cryfach a mwy hyblyg gyda'r sgiliau perthnasol sydd eu hangen arnom i lunio dyfodol y sefydliad.

Byddwn wedi llwyddo os byddwn yn cynnal sgoriau uchel o ran ymgysylltu â staff ac yn gallu ddangos sut rydym wedi mynd i'r afael ag anghydraddoldebau strwythurol mewn cyflogau, dyrchafiadau a throsiant cydweithwyr o leiafrifoedd ethnig ac anabl.

Gwella ein galluoedd digidol

Ein nod yw darparu rhaglen technoleg ddigidol effeithiol sy'n cryfhau ein seiberddiogelwch, yn rhoi hwb i gynhyrchiant, ac yn gwella'r profiad digidol i'n pobl, a'r bobl rydym yn eu gwasanaethu. Rydym hefyd eisiau cefnogi arloesedd a newid yn y dyfodol, gan reoli costau a risgiau ar yr un pryd. 

Byddwn wedi llwyddo os ydym wedi cynnal diogelwch gwybodaeth, gwella technoleg bresennol, a rhoi offer digidol newydd ar waith i wella cynhyrchiant a phrofiad defnyddwyr.

Gweithio'n effeithlon ac effeithiol

Ein nod yw gweithio mor effeithlon â phosibl er mwyn i ni allu bod yn effeithiol mewn amgylchedd sy'n newid yn gyson, gan ddefnyddio tystiolaeth a gwerthuso i lywio ein penderfyniadau.

Byddwn wedi llwyddo os gallwn ddangos sut mae ein hasesiadau o risgiau a manteision yn ein helpu i reoli ein hadnoddau'n effeithiol, a gallwn ddangos gwell effeithlonrwydd o ran sut rydym yn gweithio.

Dangos cyfrifoldeb cymdeithasol a chynaliadwyedd amgylcheddol 

Ein nod yw sicrhau bod ein gwaith cynaliadwyedd amgylcheddol yn berthnasol, a dangos effeithiau pendant. Rydym hefyd eisiau bod yn sefydliad cymdeithasol gyfrifol. 

Byddwn wedi llwyddo os ydym ar y trywydd iawn i gyflawni ein nod sero net ac yn gallu asesu ein heffaith a'n gwerth fel sefydliad mwy cynaliadwy.