Ystadegau ac adroddiadau addasrwydd i ymarfer
Bob blwyddyn, rydym yn cyhoeddi adroddiad ar y pryderon a gawn am addasrwydd meddygon i ymarfer. Wrth sôn am addasrwydd i ymarfer, rydym yn golygu gallu meddyg i ymarfer yn ddiogel a chynnal hyder y cyhoedd yn ei broffesiwn.
Read this page in English
Mae ymchwiliadau addasrwydd i ymarfer yn cynnwys cyfran fach o feddygon bob blwyddyn, lle mae pryderon difrifol am ddiogelwch cleifion neu hyder y cyhoedd.
Mae’r adroddiad eleni yn cynnwys mwy o gyd-destun, eglurder a thryloywder o ran sut rydym yn asesu pryderon.
Back
Neges gan ein Prif Weithredwr
Mae hyder y cyhoedd mewn meddygon yn seiliedig ar filiynau o achosion o ryngweithio sy’n digwydd gyda chleifion bob dydd.
Mae’r rhan fwyaf o’r achosion hyn o ryngweithio yn ddiogel, yn gefnogol ac yn broffesiynol. Pan fydd pryderon yn codi, ein rôl ni yw sicrhau eu bod yn cael eu hasesu yn deg, yn gyson ac yn annibynnol.
Mae’r adroddiad hwn yn cyflwyno data ar sut ymdriniwyd â phryderon am addasrwydd meddygon i ymarfer yn 2025. Am y tro cyntaf eleni, rydym wedi cynnwys gwybodaeth ychwanegol am sut mae ein prosesau’n gweithio, ac yn bwysig iawn, am sut rydym yn cefnogi pawb sy’n ymwneud ag ymchwiliad.
Y tu ôl i’r ystadegau yn yr adroddiad hwn mae pobl y bydd y penderfyniadau a wnawn yn effeithio ar eu bywydau. Rydym yn deall y gall mynegi pryderon ac ymateb iddynt fod yn brofiad anodd, gyda chanlyniadau pellgyrhaeddol i gleifion a’u teuluoedd, yn ogystal ag i feddygon a’u cydweithwyr. Rydym wedi ymrwymo i ymdrin â phob achos gyda thosturi, eglurder a thegwch. Gobeithio y bydd yr adroddiad hwn yn helpu pobl i deimlo’n wybodus ac yn hyderus os bydd angen iddynt gymryd rhan yn y broses addasrwydd i ymarfer.
Byddwn yn falch o glywed eich adborth ar yr adroddiad a’r hyn yr hoffech ei weld yn cael ei gynnwys y flwyddyn nesaf.
Charlie Massey, Prif Weithredwr.
Neges gan ein Cyfarwyddwr Addasrwydd i Ymarfer
Dros fwy na dau ddegawd yn y GMC, rwyf wedi gweld bod hyder y cyhoedd mewn meddygon yn dibynnu ar y safonau maen nhw’n eu cynnal bob dydd, yn ogystal â system reoleiddio sy’n gweithredu’n deg ac yn bendant pan fydd pryderon difrifol yn codi.
Fel y gwelwch yn yr adroddiad, mae nifer y pryderon a godwyd gyda ni wedi cynyddu yn ystod y blynyddoedd diwethaf. Y rheswm pennaf am hyn yw bod mwy o bryderon yn cael eu codi gan aelodau o’r cyhoedd. Fodd bynnag, mae’n bwysig cofio mai dim ond am gyfran fach o feddygon y mae pryderon yn cael eu codi. Nid yw’r rhan fwyaf o’r rheini sy’n dod i law yn cyrraedd y trothwy cyfreithiol ar gyfer ymchwiliad pellach.
Pan na fydd pryder yn cyrraedd y trothwy, nid yw hyn yn golygu nad oes angen cymryd unrhyw gamau. Yn hytrach, gall fod yn fwy priodol i gyflogwr y meddyg neu sefydliad arall ddelio â’r mater.
Mae’r gyfraith yn mynnu ein bod yn ystyried yr holl gwynion a ddaw i law. Mae’n bwysig nid yn unig ein bod yn cyflawni’r cyfrifoldeb hwn yn ofalus ac yn gyson, ond hefyd ein bod yn dangos tosturi tuag at bawb sy’n gysylltiedig.
Mae bod yn agored am ein prosesau yn rhan allweddol o helpu pobl i ddeall ein rôl a sut rydym yn gwneud penderfyniadau, a bwriad yr adroddiad hwn yw cefnogi hynny.
Anthony Omo, Cyfarwyddwr Addasrwydd i Ymarfer.
Cefnogaeth
Gall codi pryderon a mynd drwy ymchwiliad fod yn frawychus i bawb dan sylw. Dyna pam rydym yn darparu gwybodaeth, arweiniad a mynediad at gefnogaeth emosiynol.
Mae’r ystadegau yn yr adroddiad hwn yn ymwneud â phryderon a godwyd am feddygon. Gan mai dim ond ers mis Rhagfyr 2024 rydym wedi bod yn rheoleiddio cymdeithion meddygol a chymdeithion anaesthesia yn swyddogol, mae’r niferoedd yn fach a gallai cyhoeddi’r ffigurau arwain at risg o adnabod y bobl dan sylw. Felly, ni allwn gyhoeddi data am gymdeithion meddygol a chymdeithion anaesthesia ar hyn o bryd.
Ystadegau blynyddol addasrwydd meddygon i ymarfer wedi’u harchifo
2009 — 2024
